Agfange hed die ganz Gschecht notürli wie emmer met de Gröndig. Wer guet cha rächne weiss, dass die im September 1972 gsi esch. Das heisst 1973 send d’Eichleguugger zom erschte Mol anere Fasnacht debii gsi. Zo de Gröndigsmetgleder hend secher de Limacher Peter, de Lindegger Hansruedi, de Bannwart Bruno ond de Warth Erwin ghört. Dä ganz Huufe esch quasi usere 8er Musig entstande, wo während de Fasnacht vo Hof zo Hof gange esch.

Scho met em erschte Chleid esch alles bishär gsehni öbertroffe worde. Met em Eicherwappe send sie stolz dor Gägend grennt. So send do d’Gwändli no einheitlech gsi ond jede hed genau gwösst, was är z’näie hed.

Zo de Afangszyt send d’Eichleguugger no eini vo de einzige Musige om de See ome gsi. Fascht nor d’Sorseer ond Beromügger send no älter.

Erscht afangs de 80er Johr esch euses Markezeiche, die schwarze, beziehigswiis wiisse Chleider entstande. Au hed mer i dere Zyt bi üs Grende abgschafft. Während mer das damals no völlig doof gfonde hed, hend sech inzösche wohl die meischte dra gwönnt ond mer weiss eifach, dass das zo üs ghört. Au wenn das Thema emmer weder zo Diskussione Alass ged.

1985 heds de erscht Broch ide doch au scho meh aus zähjährige Gschecht vo de Eichleguugger gäh. Noch dem dass vell vo de erschte Generation dä Huufe verloo hend, sends no met 17 Nase do gstande. Trotzdem hends ned ufgäh ond das Ganze dörezoge ond neu ufbouet. Sett do gets bi üs aber emmer relativ vell Wächsu ond d’Groppe esch vo Oswärtige prägt. De Höhe- oder Tüüfponkt i dere Aglägeheit hed mer erreicht gha, wo mol vo 30 Lüüt doch no 3 Eicher metgmacht hend. I dere Zyt send Bäribrommer als gröschti Konkurränz (wemmer das eso wott säge) ufträtte ond hend vell jongi Eicher i ehri „Dienschte“ gno.

Vor allem am Anfang esch d’Struktur vo üs sehr lose gsi. D’Probe bischpelswiis hend erscht im Januar agfange on d’Buechhaltig esch of handgrschrebene Fötzeli gmacht worde.

Erscht spöter hed mer agfange, sech wie ne Verein z’organisiere. Die verschedene Kommissione send gröndet worde ond es hed en rechtigi Buechfüehrig gäh. Trotzdem semmer bis vor einige Johr nor as lose zäme gsi ond hend erscht 1999 en Verein gröndet.

Früehner send d’Eichleguugger nor einisch vor de Fasnacht ufträtte ond hend denn erscht währed de Fasnacht alles gäh. Höt esch das natürlech ou ganz anders ond mer hend wie die meischte andere Musige zemmli es „strängs“ Programm i de Vorfasnacht.

Scho glii hed mer am Schmotzige Donnschtig im Eichhof en Chenderfasnacht organisiert, wos för alli Wienerli ond Chueche usw. gäh hed. Afangs vo de 90er Johr hemmer denn i de Sonne en Uslompete gmacht, wo es paar Johr e rechtige Erfolg gsi esch. Obwohl nämmlech d’Spomuki-Bäll i dere Zyt super glaufe send, hed mer au die alte Eicher welle ad Fasnacht locke.

S’erschte Mol eso rechtig gfiiret hemmer met 19 Johr. Jo, 20i cha jede fiire, aber 19i? För das Jubi hend alli en chliine Waage mösse met näh, was zo vellne loschtige Szene gfüehrt hed.

Erscht 1990 heds die erscht Plakette vo de Eichleguugger gäh. Bis hött probiered mer im Motto treu z’bliibe ond emmer echli öppis ossergwöhnlechs z’mache. S’gliiche göutet för üsi Lieder. Settem Afang hed mer versuecht öppis anders z’spele, als die andere Musige. Ned, dass mer emmer s’Gliichlige ghört.

Nochdem dass mer d’Plakette igfüehrt gha hed, hed denn 1991 s’erschte Probeweekend im Brünig statt gfonde, was en volle Erfolg gsi esch. Notürlech hemmer dä Alass bis hött bibhalte. Glii drof abe send denn die erschte internationale Uftrett (Feldkirch) cho. Bis hött beldet de Oswärtsuftrett de erscht Höheponkt im Fasnachsfieber.

Zom 25igschte Gebortstag hemmer denn es rechtig grosses Fäscht lanciert, wo ne Bombeerfolg gsi esch.

… (s’30-Johr Jubiläum esch leider zonere Ziit gsii, wo dä vo de Website die ischlägige Getränk vo de Fasnacht no ned hed döffe konsumiere. Ech wär froh, wenn mer öpper chönnt brechte, was det gloufe esch!)

Ou üses 35-Johr Jubiläum im 2007 esch e tolli Sach gsii. Met de Farbe pink för d’Fraue ond orange för d’Männer hend mer üsi Tradition met de Grondfarbe schwarz oder wiss usnahmswis einisch broche. Im einzelne hed das sehr speziell usgseh, als ganzi Groppe aber super gwerkt!

Met 40 Metgleder send mer a de Fasnacht 2008 noch gwössne Startschwerigkeite so rechtig in Fahrt cho.

Wies die letschte Johr zor Tradition worde esch, hend üs ou a de Fasnacht 2009 emmer weder die ehemalige Metgleder begleitet. Die Groppe nennt sech s’Gmüetshüüfeli ond mer fendet das e super Sach, dass de Bezog zom Verein ned so schnell verlore god.

3 Johr spöter, a de Fasnacht 2012, hend mer bereits üses 40-Johr Jubiläum chönne fiire. Als ganz speziells Highlight send mer i dem Johr vo guet 20 Ehmalige musikalisch ond ou a de Bar onterstötzt worde. Met dütlech öber 50 Lüüt uf de Böhni hend mer jewils e wonderbari Wand chönne änezoubere. Zom 3. mol in Folg hend mer i de Vorfasnacht d’Weltcup Skirenne z’Kitzbühel bsuecht. Ou i dem Johr hed üs de Didier Cuche ned entüscht ond allne einisch me zeigt, wie mer d’Streiff fahrt.

Üsi Fasnachtsparty, d‘ „Remember Me“, hend mer bereits zom 2. mol ond sehr erfolgrich chönne dorefüere. Uf das abe hend sech d’Eichleguugger de erst eiget Ahänger chönne leiste. Metlerwile schön beschriftet, för alli Instrumänt apasst ond sogar met Platz för Musigboxe usgstattet, begleitet är üs a jede Uftrett.

2017 esch üses 45-jöhrige Jubiläum gsi. Wie sech’s die letzte Jubijohr so ibörgeret hed, hemmer au i dem Johr uf wiiss oder schwarz im Chleid verzechtet ond hend es farbigs Chleid gha.

En wiitere Höheponkt in Sache aktive Metgleder hemmer i de Johre 2017/2018 dörfe verzeichne. Met 39 aktive Metgleder semmer so vell wie scho lang nömme gsi.